రేప‌టి నుంచి అసెంబ్లీ స‌మావేశాలు

ఏపీ టాప్ న్యూస్‌: ఆంధ్రప్రదేశ్ అసెంబ్లీ సమావేశాలకు అంతా సిద్ధమయ్యింది. రేప‌టి నుంచి ఐదు రోజుల పాటు అసెంబ్లీ స‌మావేశాలు జ‌ర‌గ‌నున్నాయి. తొలిరోజు (బుధవారం) ఎమ్మెల్యేలందరూ ప్రమాణ స్వీకారం చేయనున్నారు. ప్రొటెం స్పీకర్ శంబంగి చిన అప్పలనాయుడు సభ్యులతో ప్రమాణం చేయిస్తారు. రెండో రోజు (గురువారం) స్పీకర్, డిప్యూటీ స్పీకర్‌ల ఎంపిక ఉంటుంది. మూడో రోజు (శుక్రవారం) గవర్నర్ ఉభయ సభల్ని ఉద్దేశించి ప్రసంగిస్తారు. అసెంబ్లీ సమావేశాల్ని హుందాగా నిర్వహిస్తామంటున్నారు చీఫ్‌విప్ గడికోడి శ్రీకాంత్ రెడ్డి. బుధవారం ఎమ్మెల్యేల ప్రమాణ స్వీకారం చేస్తారని.. తొలుత జగన్, తర్వాత చంద్రబాబు ప్రమాణం చేస్తారని తెలిపారు.
గురువారం స్పీకర్, డిప్యూటీ స్పీకర్ ఎంపిక ఉంటుందని తెలిపారు. శుక్రవారం ఉభయ సభల్ని ఉద్దేశించి గవర్నర్ ప్రసంగిస్తారన్నారు. సభను ప్రజాస్వామ్య పద్ధతిలో నిర్వహిస్తామని.. ప్రతిపక్షాన్ని కూడా గౌరవించి సభలో అవకాశం ఇస్తామన్నారు. గత ప్రభుత్వం ప్రతిపక్ష సభ్యులకు కనీసం ఛాంబర్ కూడా ఇవ్వకుండా అవమానించిందన్నారు శ్రీకాంత్ రెడ్డి. తాము మాత్రం అందరికీ సరైన ప్రాధాన్యత కల్పిస్తామన్నారు. తొలి కేబినెట్ సమావేశంతోనే సీఎం జగన్ ఆకాశానికి ఎదిగారని ప్రశంసలు కురిపించారు. ఎన్నికల సమయంలో ఇచ్చిన హామీలను అమలు చేసేలా తొలి కేబినెట్ భేటీలో నిర్ణయాలు తీసుకోవడం గర్వంగా ఉందన్నారు.

Share