కేసీఆర్ అంటే బాబుకు భ‌య‌మా?

ఏపీ టాప్ న్యూస్‌: తెలంగాణ ముఖ్య‌మంత్రి కె.చంద్ర‌శేఖ‌ర్‌రావు అంటే ఆంధ్ర‌ప్ర‌దేశ్ ముఖ్య‌మంత్రి నారా చంద్ర‌బాబు నాయుడికి భ‌య‌మా? అందుకే అన్నివేల సార్లు కేసీఆర్‌ను బాబు తిట్టాడా? అంటే అవున‌నే అంటున్నారు కేసీఆర్‌. వివ‌రాల్లోకి వెళ్లితే.. ఈ మూడు నెలల్లో తనను మూడువేల సార్లు తిట్టారని.. దీన్ని బట్టే కేసీఆర్ అంటే ఏంటో చంద్ర‌బాబుకు అర్థమవుతోందని కేసీఆర్ అన్నారు. పరిపాలన చేతకాదని ఎవరు అన్నారో వారి కంటే బాగా పనిచేస్తున్నామన్నారు. విభజన తర్వాత దారితెన్ను తెలియని తెలంగాణను దేశంలోనే అగ్రగామిగా నిలిపి.. అన్ని రంగాల్లో ఓ మార్గదర్శకంగా నిలిపామన్నారు. ఆదివారం (17-03-2019) కరీంనగర్‌లో ఎన్నికల ప్రచార సభలో పాల్గొన్న గులాబీ బాస్ ప్రతిపక్షాలపై విమర్శనాస్త్రాలు సంధించారు. 20 ఏళ్ల క్రితం తెలంగాణ తేస్తానని చెబితే చంద్రబాబు అవహేళన చేశారని గుర్తు చేశారు గులాబీ బాస్. కేసీఆర్‌తో ఏమీ కాదు.. ఏం చేసినా కర్త, కర్మ, క్రియ అన్నీ తానేనని చంద్రబాబు మాట్లాడరన్నారు.
తెలంగాణ కోసం తాను ముందడుగు వేసినప్పుడు మగల పుట్టింది.. దుబ్బల పోతదిలే అని చంద్రబాబు అనుకున్నారని చెప్పుకొచ్చారు. ఇప్పుడు మాత్రం తనను చూసి చంద్రబాబు భయపడుతున్నారని.. ఆంధ్రాలో ఓడిస్తాననే తనను టార్గెట్ చేశారన్నారు. ఇప్పుడు కేసీఆర్ ఎక్కడి నుంచి ఎక్కడికి వచ్చిండనేది తెలుస్తోందన్నారు. జాతీయ పార్టీలతో దేశానికి ఒరిగిందేమీలేదన్నారు కేసీఆర్. రాహుల్, నరేంద్ర మోదీలను దేశం నుంచి తరిమికొట్టి.. కాంగ్రెస్, బీజేపీలను సాగనంపాలన్నారు. 16 ఎంపీలు గెలిస్తే ఏం చేస్తావని కొందరు అడుగుతున్నారని.. కాంగ్రెస్‌, బీజేపీ పాలిత రాష్ట్రాల్లో రైతాంగానికి 24 గంటలు కరెంట్‌ ఇచ్చే రాష్టం ఒక్కటైనా ఉందా అని మోదీ, రాహుల్‌ గాంధీని ప్రశ్నించారు. దేశాన్ని కాంగ్రెస్‌ 50 ఏళ్లకుపైగా పాలించింది.. బీజేపీ 11 ఏళ్లు అధికారంలో ఉన్నా తాగు నీళ్లు లేవన్నారు. దేశం బాగుపడాలంటే కేంద్రంలో సమాఖ్య ప్రభుత్వం రావాలన్నారు.

Share