నామా.. రాజీనామా

ఏపీ టాప్ న్యూస్‌: తెలంగాణలో టీడీపీకి షాక్ తగిలింది. పార్టీ సీనియర్ నేత, మాజీ ఎంపీ నామా నాగేశ్వరరావు పార్టీకి గుడ్ బై చెప్పారు. పొలిట్ బ్యూరో పదవి, పార్టీ ప్రాధమిక సభ్యత్వానికి మంగళవారం (19-03-2019) రాజీనామా చేశారు. గతేడాది డిసెంబర్‌లో జరిగిన తెలంగాణ అసెంబ్లీ ఎన్నికల్లో ప్రజా కూటమి తరఫున నామా పోటీ చేశారు. టీర్‌ఎస్ అభ్యర్థి పువ్వాడ అజయ్‌కుమార్‌‌పై ఓటమి పాలయ్యారు. అప్పటి నుంచి పార్టీ కార్యక్రమాలకు దూరంగా ఉంటున్నారు. టీడీపీని వీడిన నామా నాగేశ్వరరావు త్వరలోనే టీఆర్ఎస్‌లో చేరబోతున్నారట. నామా రెండు రోజుల క్రితం టీఆర్ఎస్ అధినేత కేసీఆర్‌ను ఫాం హౌస్‌లో కలిసినట్లు తెలుస్తోంది. ఈ భేటీలో పార్టీలో చేరే అంశంపై చర్చించారట. నాగేశ్వరరావు కారు ఎక్కడం ఖాయమయ్యిందని.. ఖమ్మం నుంచి ఎంపీగా పోటీచేయబోతున్నారని ప్రచారం జరుగుతోంది. కేసీఆర్ నుంచి హామీ రావడంతో.. రెండు రోజుల్లో పార్టీలో చేరతారట.
నామా నాగేశ్వరరావు సుధీర్ఘకాలం టీడీపీలో పనిచేశారు. 2004లో టీడీపీ తరపున ఖమ్మం నుంచి ఎంపీగా పోటీచేసి రేణుకా చౌదరి చేతిలో ఓడిపోయారు. 2009లో రేణుకపై విజయం సాధించారు. 2014లో మళ్లీ బరిలోకి దిగిన నామా పొంగులేటి శ్రీనివాస్‌రెడ్డి చేతిలో ఓడారు. గతేడాది డిసెంబర్‌లో జరిగిన తెలంగాణ అసెంబ్లీ ఎన్నికల్లో ఖమ్మం నుంచి ఎమ్మెల్యేగా పోటీ చేసి ఓడిపోయారు.

Share