20 లక్షల ఇళ్ల మైలురాయి దాటిన ‘ఇంటింటికీ తెలుగుదేశం-2026’

అమరావతి: తెలుగుదేశం పార్టీ ప్రతిష్టాత్మకంగా చేపట్టిన ‘ఇంటింటికీ తెలుగుదేశం-2026.. 2 ఏళ్ల నమ్మకం, అభివృద్ధి-సంక్షేమం’ కార్యక్రమం రాష్ట్రవ్యాప్తంగా విజయవంతంగా కొనసాగుతోంది. రెండేళ్ల పాలనలో ప్రభుత్వం అమలు చేసిన అభివృద్ధి, సంక్షేమ కార్యక్రమాలను ప్రజలకు వివరించేందుకు చేపట్టిన ఈ కార్యక్రమం 20.61 లక్షల ఇళ్లను చేరుకుని మరో కీలక మైలురాయిని అధిగమించింది.

టీడీపీ విడుదల చేసిన ప్రకటన ప్రకారం, సోమవారం ఒక్కరోజే రాష్ట్రవ్యాప్తంగా 3 లక్షలకు పైగా ఇళ్లను పార్టీ శ్రేణులు సందర్శించాయి. దీంతో కార్యక్రమం ప్రారంభమైనప్పటి నుంచి ఇప్పటివరకు మొత్తం 20.61 లక్షల ఇళ్లను చేరుకున్నట్లు వెల్లడించింది.

సోమవారం రాష్ట్రవ్యాప్తంగా మంత్రులు, ఎమ్మెల్యేలు, నియోజకవర్గ ఇన్‌ఛార్జులు, ప్రజాప్రతినిధులు, పార్టీ నాయకులు, కార్యకర్తలు పెద్దఎత్తున ఇంటింటికీ వెళ్లి ప్రజలను కలుసుకున్నారు. ఈ సందర్భంగా ప్రభుత్వం రెండేళ్లలో చేపట్టిన అభివృద్ధి కార్యక్రమాలు, అమలు చేస్తున్న సంక్షేమ పథకాలను ప్రజలకు వివరించారు.

టీడీపీ వర్కింగ్ ప్రెసిడెంట్ నారా లోకేష్ మాట్లాడుతూ, రాష్ట్రంలోని అన్ని జిల్లాల్లో ఈ కార్యక్రమానికి ప్రజల నుంచి విశేష స్పందన లభిస్తోందన్నారు. ఇది ప్రభుత్వంపై ప్రజలకు ఉన్న విశ్వాసానికి నిదర్శనమని పేర్కొన్నారు.

‘ఇంటింటికీ తెలుగుదేశం-2026’ కార్యక్రమం 20 లక్షల ఇళ్ల మార్కును దాటడం పట్ల పార్టీ కార్యకర్తలు, నాయకత్వాన్ని నారా లోకేష్ అభినందించారు. క్షేత్రస్థాయిలో పార్టీని మరింత బలోపేతం చేయడంతో పాటు ప్రభుత్వ విజయాలను ప్రతి ఇంటికీ తీసుకెళ్లే లక్ష్యంతో ఈ కార్యక్రమం కొనసాగుతుందని తెలిపారు.